د جوزجان د تخنیکي انستیتوت د فارغانو فراغت مراسم ترسره شول
د جوزجان ولایت د تخنيکي انستيتوت ۳۶ تنو فارغانو خپل فراغت په پار نمانځ غونډه نیولې وه.
دوی د موټرو تخنیک، نفت او ګازو، برښنا او ساختماني انجینرۍ څانګو څخه فارغ شول.
د دغه زده کړیالانو د فراغت په مراسمو کې د جوزجان والي قاري ګل حیدر شفق، د دولتي ادارو رئیسانو او آمرینو، دیني عالمانو او د زده کوونکو والدینو ګډون کړی وو.
د جوزجان والي وویل، ځوانانو ته د زده کړو زمینې برابرول د حکومت له لومړیتوبونو څخه دی.
نوموړي زياته کړه، ځوانان بايد د بل هر وخت په پرتله د ديني او عصري پوهې د ترلاسه کولو لپاره زياتې هڅې وکړي، چې هېواد لوستو ځوانانو ته اړتيا لري.
